Мамырдың 1-2 және 7-8 күндері Түркістан музыкалық драма театры алғаш рет музыкалық комедия «Беу, қыздар-ай!» қойылымының премьерасын көрерменге ұсынады.
Осыған орай, бүгін аталған театрда баспасөз конференциясы өтті. Қанабек Байсейітов пен Қуандық Шаңғытбаевтың бұл комедиясы Кеңес заманында Социалистік Еңбек ері Зылиха Тамшыбаеваға арнап жазылған шығарма. Шығарманың сахнаға шыққанына жарты ғасырдан астам уақыт өтсе де, әлі де өз көрерменін жоғалтпаған.
«Бір ай уақыттың ішінде осы «Беу, қыздар-ай!» шығармасына дайындық жүргізілді. Қойылымның 40-50 жылдық тарихы бар. Шығарма ескілеу болғандықтан, біз оны қазіргі заманға лайықты етіп 40 пайызын жаңарттық. Бірақ, түпкі мазмұны сол қалпында қала бермек. Бұл туындыдан көрермендер ғашықтар, жастар жайында әдемі бір дүниені көре алады. Спектакль жанды дауыста және балет әртістерімен бірге қойылатын музыкалық шығарма болғандықтан бұрынғы шығармалардан ерекшеленіп, жаңашыл бағытта ұсынылмақ. Алғаш рет заманауи бағытта қойылатын туындымызға барлық облыс, қала тұрғындары мен қонақтарын тамашалауға шақырамыз», — деді жас режиссер және актер Олжас Жақыпбек.
Айта кетсек, заманауи бағытқа өзгертілген «Беу, қыздар-ай!» спектаклі әлеуметтік желінің белең алуын, ауылдағы білікті мамандардың тапшылығы мен жастардың өзіне лайықты теңін табуының қиындығы секілді мәселелерді көтерген.
