Түркістандық ерікті Әсел Бимырзаеваның 2022 жылы қала көлемінде ұйымдастырған «Армандар орындалады» шарасы енді облыс көлемінде қолға алынды.
Өткен жылы игі істе 70 ерекше қажеттілігі бар бала армандарын орындаса, биыл жоба жыл басталғалы 33 балаға қуаныш сыйлап үлгерді.
Жоба басында түркістандық ерекше балаларды қамтыған жобада бүгінде Кентау қаласы, Отырар, Бәйдібек аудандарынан да келген балалар арманы орындалуда.
«Армандар орындалады» жобасы жалғасын тауып жатқаны ниеті түзу жандардың арқасында деп ойлаймын. Бұлай дейтінім, былтыр бастау алған жоба бүгінге дейін ерекше балаларға қуаныш сыйлаумен келеді. Тоғызыншы рет өткізілген іс-шара бұрынғысынан өзгерек. Бұл жолы Бәйдібек, Отырар аудандарынан, Кентау қаласынан ерекше балалар қатыстырылды. Демек, қала көлемінде басталған жобамыз облыс деңгейінде өткізілуге мүмкіндігі бар. Басқа ауданнан келген балалардың біразы киелі шаһарымызда алғаш рет келуі екен. Қуаныштарында шек жоқ! Қуаныш сыйлай алғанымыз үшін біз де керемет күй кештік» дейді, жоба негізін қалаушы Әсел Бимырзаева.
Ерекше қажеттілігі бар балалардың арманы жазылған хаттарды жүзеге асыруды мақсат еткен жоба әлі де жүйелі жалғасады.
