«Өнерлі өлке – 2025» фестивалі аясында Сауран аудандық «Орталықтандырылған кітапханалар жүйесі» КММ-нің ұйымдастыруымен ауқымды тақырыптарды қамтыған мазмұнды кітап көрмелері оқырман назарына ұсынылды.
Мақсаты – ұлттық мұраларымызды дәріптеу, елдік сананы арттыру, тұлғалар тағылымын тануға жол ашу.
Көрме бірнеше тақырыптық бөлімдерден тұрды:
«Саураным – сырлы мекенім» – Сауран өңірінің тарихи-мәдени келбеті, шежірелі тұлғалары, өлкеден шыққан ақын-жазушылар мен зиялы қауым өкілдерінің еңбектері жинақталған. Саураным – тек тарих емес, өнер мен руханияттың ордасы екенін дәлелдейтін айрықша көрме бөлігі болды.
«Ассамблея – достықтың діңгегі» бөлімінде Қазақстан халқы Ассамблеясының бейбітшілік пен бірлік жолындағы үлесі, еліміздегі ұлттар достығы, татулық пен келісім тақырыптары қамтылды.
«Ұлы Дала елінің ұлы хандығы» – қазақ хандығының құрылуы, хандар шежіресі, мемлекеттіліктің бастауы мен даму жолы жайлы тарихи еңбектер қойылып, Тәуелсіздікпен жалғасқан тағылымды тарих таныстырылды.
«Абай мұрасы – халық ұлағаты» атты бөлімде хәкім Абайдың рухани мұрасы, өлеңдері мен қара сөздері, философиялық терең ойлары, ақын шәкірттері мен ұрпаққа қалдырған аманаты ұсынылды.
«Шығыстың шамшырағы – Әл-Фараби» көрме сөресінде ұлы ойшылдың еңбектері, ғылыми-философиялық мұралары, әлемдік өркениетке қосқан үлесі баяндалды. Оқырмандар ұлы ғалым жайлы қызықты деректермен танысты.
«Мәңгілік даңқ, мәңгілік тағзым» бөлімінде Ұлы Отан соғысы және саяси қуғын-сүргін құрбандарына арналған әдебиеттер ұсынылды. Бұл – өткенге тағзым, ерлікке бас иу, ұлттың қайсар рухына құрмет көрсету алаңы болды.
Кітап көрмелері арқылы оқырмандар ел тарихының маңызды кезеңдерімен, тұлғалардың өмір жолымен, мәдени мұрамызбен жақынырақ танысып, рухани азық алды. Іс-шара елдік сана мен мәдени құндылықтарды ұлықтауда үлкен маңызға ие болды.
