Бүгін Қазақстан Республикасының Премьер-министрі Ә.Смайыловтың тапсырмасына сәйкес Түркістан қаласы адами әлеуетті дамыту бөлімінің ұйымдастыруымен білім беру объектілерін терроризмге қарсы қорғауды ұйымдастыруға бағытталған оқу-жаттығу жиыны өтті. Қаладағы Некрасов атындағы №9 мектеп-гимназияда өткен шараға қалалық адами әлеуетті дамыту бөлімінің басшысы О.Қолдасова, Түркістан қаласы Полиция басқармасының ЭҚІҚТ жедел уәкілі, полиция аға лейтенанты Н.Есжан қатысып, оқу-жаттығу жиынының куәсі болды.
Шара барысында төтенше жағдайлар басқармасының, денсаулық сақтау басқармасының, өрт сөндіру басқармасының қызметкерлері жаттығу шараларын көрсетіп, төтенше жағдайлар кезінде атқарылатын жұмыстар, алғашқы көмек көрсету жолдарын көрсетті. Шара соңында сөз алған сала басшылары оқушыларға мемлекетіміздің ең басты құндылығы – адам және адам өмірі екендігін жеткізіп, төтенше жағдайлардың алдын алу, алғашқы көмек көрсетуді үйрену адам өмірін сақтауға септігін тигізетінін атап өтті.
