Ұлы Жеңіс күні – азаттық үшін арпалысқан аталар рухына тағзым етіп, ел мен жердің қадірін терең ұғынатын тағылымды күн. Бұл тарихи дата еліміздің батырларын еске алып, ерліктерін ұлықтауға, жастарды патриоттық рухта тәрбиелеуге бағытталған. Қазақстанда Ұлы Отан соғысындағы Жеңістің 80 жылдығын кең көлемде аталып өтуін ұйымдастыру үшін Мәдениет және ақпарат министрлігі бастамасымен бірнеше ауқымды бастамалар мен іс-шаралар жарияланған болатын.
Осы ретте, Жаңа Иқан ауылдық округінде Ұлы Отан соғысы құрбандарына арналған ескерткіш алдында еске алу рәсімі ұйымдастырылып, гүл шоқтары қойылды. Шара барысында ел тыныштығы үшін жанын қиған боздақтарға деген халықтың ыстық ықыласы мен терең құрметі сезілді.
Шараға ауыл тұрғындары, мектеп оқушылары, Ауған соғысының ардагерлері мен жергілікті басшылар қатысып, бейбіт өмірдің бағасын ұрпаққа ұғындыруға күш салды.
Жиында ауыл ақсақалдары мен округ басшылары сөз сөйлеп, Жеңістің киелі мәні мен ел бірлігінің маңызын айрықша атап өтті. Сондай-ақ, Жаңа Иқан мешітінің молдасы Юлдашев Мухаммеджан жиналған жұртқа дұға жасап, шейіт болған ерлердің рухына Құран бағыштады. Көпшілікке иман мен Отанға деген махаббаттың бірлігін насихаттады. Бұл ел тарихына деген тағзым, батырларға деген құрмет, болашаққа берілген аманат көрінісі болды.
Ұлы Жеңістің 80 жылдығы – бұл тек өткенді еске алу ғана емес, сонымен қатар болашақ ұрпаққа бейбітшілік пен еркіндіктің құндылығын ұғындыру. Осы мерейтой аясында ұйымдастырылып жатқан іс-шаралар еліміздің тарихына тағзым етіп, ұрпақтар сабақтастығын нығайтуға бағытталды.
