Президент Қасым-Жомарт Тоқаевтың бастамасымен жүзеге асырылып жатқан «Таза Қазақстан» жалпыұлттық экологиялық акциясы еліміздің экологиялық мәдениетін қалыптастыруға және азаматтардың қоршаған ортаға деген жауапкершілігін арттыруға бағытталған.
2024 жылғы 2 қыркүйектегі Қазақстан халқына Жолдауында Мемлекет басшысы «Таза Қазақстан» акциясының маңыздылығын атап өтіп, бұл бастама уақытша шара емес, жыл бойы жалғасуы тиіс екенін айтты. Ол бұл жобаның қоғамда жаңа мәдениет пен қоғамдық этиканы қалыптастырып, шынайы патриотизм мен Отанға деген қамқорлықтың көрінісі екенін жеткізді.
Президент тапсырмасына сай, Сауран ауданында аудан әкімдігі мен аудандық “Amanat” партиясы филиалының ұйымдастыруымен кезекті сенбілік шарасы өтті. Аудан орталығында өткен тазалық жұмыстарына 500-ге жуық тұрғын белсене қатысты. Іс-шараға 10 арнайы техника жұмылдырылды.
Тазалық науқанына аудан әкімі Мақсат Таңғатаров, облыстық мәслихат депутаты Баймахан Сүлейменов, сондай-ақ ауданның ерікті жастары, ауыл тұрғындары және мемлекеттік қызметшілер атсалысып, өз үлестерін қосты.
Облыс әкімдігінің бекіткен күнтізбелік жоспарына сәйкес, Сауран ауданы жыл соңына дейін 315 сенбілік шарасын өткізуі тиіс. Бүгінгі күнге дейін 79 сенбілік ұйымдастырылып, келесі нәтижелерге қол жеткізілді: жалпы 13 921 адам қатысып, 304 арнайы техника жұмылдырылды. Іс-шаралар барысында 25 800 түп ағаш егілді, 886,4 тонна қоқыс шығарылды.
Аталған көрсеткіштер аудан тұрғындарының қоршаған ортаны қорғауға және экологиялық мәдениетті арттыруға деген жауапкершілігін айғақтайды. Сенбілік жұмыстары жыл соңына дейін жалғасып, аудандағы экологиялық ахуалды жақсартуға бағытталады.
