2025 жылы Қазақстан халқы Ассамблеясының құрылғанына 30 жыл толып отыр. Бұл – еліміздегі бірлік пен татулықтың, этносаралық келісімнің символына айналған іргелі құрылымның мерейтойы.
1995 жылы 1 наурызда құрылған Ассамблеяның мақсаты – Қазақстанда тұратын барлық этностардың мүддесін қорғау, мәдениеті мен дәстүрін дамытуға қолдау көрсету, қоғамдық келісімді сақтау және нығайту.
30 жыл ішінде Ассамблея ел ішіндегі тұрақтылықты қамтамасыз етуде маңызды рөл атқарды. Бүгінде оның құрамында 600-ден астам этномәдени бірлестік жұмыс істейді. Ассамблея мүшелері мемлекеттік бағдарламаларға белсенді атсалысып, қайырымдылық, білім, мәдениет, медиа салаларында үлкен жобаларды іске асыруда.
Ассамблеяның арқасында еліміздегі түрлі этностар бейбіт өмір сүріп, бір мақсатқа жұмыла еңбек етуде. Бұл – Қазақстанның басты жетістіктерінің бірі.
30 жылдық мерейтой – бірлік пен ынтымақты ұлықтау, көпұлтты Қазақстан халқының достығын дәріптеу мерекесі. Бұл – «Татулық пен тұрақтылық – мәңгілік елдің тірегі» деген қағиданың өміршеңдігін дәлелдейтін маңызды кезең.
Қазақстан халқы Ассамблеясының 30 жылдығына орай, Түркістан облысының қоғамдық даму басқармасының ұйымдастыруымен өткен «Ақыл-ой» атты зияткерлік сайыста Сауран ауданының командасы қала және аудан командалары арасында жоғары нәтиже көрсетіп, жүлделі І орынды иеленді.
Осы додада Сауран ауданы атынан қатысқан Турметов Данияр ерекше білімділігімен және алғырлығымен көзге түсіп, жеңіске зор үлес қосты.
Құттықтаймыз! Бұл — білім мен табандылықтың жеңісі! Бүгінгі күннің қарқынды дамыған заманы әрбір адамның тек кәсіби білімімен ғана емес, зияткерлік әлеуетімен де ерекшеленуін талап етеді. Осы тұрғыда ересектер арасындағы зияткерлік сайыстар өткізу – тұлғалық дамудың, ұжымдық бірліктің және салауатты бәсекелестіктің маңызды құралы болып табылады.
Зияткерлік сайыстар ересек адамдардың ойлау қабілетін дамытып, есте сақтау, логикалық тұжырым жасау және жылдам шешім қабылдау секілді дағдыларын жетілдіреді. Сонымен қатар, мұндай шаралар адамды жаңалыққа құштар етіп, үнемі білімін толықтырып отыруға ынталандырады.
Ұжым ішінде өткізіліп тұратын зияткерлік ойындар қызметкерлер арасында ынтымақтастықты арттырып, бір-бірімен еркін пікір алмасуға жол ашады. Бұл – тимбилдингтің тиімді тәсілі.
Ең бастысы, ересектер арасындағы интеллектуалдық сайыстар – өмір бойы білім алу қағидатын насихаттайтын, салауатты ой-өрісті қалыптастыратын тамаша мәдени-танымдық бастама. Бұл қоғамның зияткерлік деңгейін көтеріп, белсенді азаматтық ұстаным қалыптастыруға ықпал етеді.
