Президент Қасым-Жомарт Тоқаев 1 маусым – Халықаралық балаларды қорғау күніне орай барша қазақстандықтарды құттықтап, балалардың құқықтары мен денсаулығын қорғау мемлекеттің басты басымдығы екенін атап өтті. Ол әрбір баланың сүйіспеншілік пен қамқорлықта өсіп, болашағына сенімді болуы маңызды екенін айтты.
Президенттің пікірінше, балалар – еліміздің болашағы, сондықтан оларға ұлттық құндылықтарды, еңбекқорлықты, білімге ұмтылуды, тарих пен мәдениетке құрметті сіңіру қажет. Сондай-ақ, ол балалардың білім, шығармашылық және спорттағы жетістіктері арқылы отбасылары мен достарын қуантуын тіледі. Президент балалар мен барлық отандастарға зор денсаулық, бақ-береке және жаңа табыстар тіледі.
Президент барлық мемлекеттік органдарға бала құқығын қорғау, олардың денсаулығын сақтау, қауіпсіздігін қамтамасыз ету және әлеуетін толық ашуға жағдай жасау бағытында жүйелі жұмыс істеуді тапсырды.
Осы бастамалар негізінде Кентау қаласында 1 маусым – Халықаралық балаларды қорғау күніне орай Кентау қаласында мерекелік сазды бағдарлама ұйымдастырылды. Шара барысында балалар ән айтып, би билеп, түрлі музыкалық және сахналық қойылымдар ұсынды. Қаланың шығармашылық үйірмелерінде тәрбиеленіп жүрген оқушылар өнерлерін ортаға салып, көрермендерге ерекше көңіл-күй сыйлады.
Мерекелік кешке Кентау қаласы әкімінің орынбасары Ақнұр Байболова қатысып, балаларды айтулы күнмен құттықтады.
«Балалар – біздің болашағымыз, ең қымбат байлығымыз. Сіздерге шат-шадыман балалық шақ, денсаулық, жарқын болашақ тілеймін. Әрбір күніңіз қуаныш пен армандарға толы болсын!» – деді.
Сонымен қатар, мерекелік кешті қыздырған көңілді флешмоб пен ойындар балалардың көңілін көтеріп, оларға ұмытылмас әсер қалдырды.
