Президент Қасым-Жомарт Тоқаев балалар мен жастардың сыбайлас жемқорлыққа қарсы мәдениетін қалыптастыруға ерекше назар аударады. Ол құқықтық сауаттылықты арттыру және адалдық қағидаттарын жас ұрпақтың бойына ерте жастан сіңіру қажет екенін бірнеше рет атап өтті. Мемлекет басшысы Білім және ғылым министрлігіне балаларды сыбайлас жемқорлыққа қарсы мәдениет негіздеріне баулуды қолға алуды тапсырған болатын.
Осы бағытта елімізде түрлі іс-шаралар ұйымдастырылуда. Мысалы, 2024 жылы «Балалар сыбайлас жемқорлыққа қарсы» республикалық сурет байқауы өтті. Бұл байқауда 3 500-ден астам жұмыс ұсынылып, 564 қатысушы жеңімпаз атанды. Шараның мақсаты — балалардың адалдық пен әділеттілікке деген көзқарасын шығармашылық арқылы білдіру.
Мұндай іс-шаралар Президенттің бастамасымен жүзеге асырылып жатқан сыбайлас жемқорлыққа қарсы саясаттың маңызды бөлігі болып табылады. Олар жас ұрпақтың құқықтық мәдениетін қалыптастыруға және қоғамда әділеттілік пен адалдық қағидаттарын нығайтуға ықпал етеді.
Осы бастамаларды негізге ала отырып, Кентау қаласында 1 маусым — Балаларды қорғау күні аясында 6-16 жас аралығындағы балалар арасында «Балалар сыбайлас жемқорлыққа қарсы» атты қалалық сурет байқауы өтті.
Шараға 33 қатысушы қатысып, балалар адалдық пен әділдік туралы ойларын, сыбайлас жемқорлыққа қарсы көзқарастарын сурет арқылы жеткізді.
Байқау қорытындысы бойынша жеңімпаздар арнайы сыйлықтармен марапатталды: 1 орын — диплом және теледидар, 2 орын — екі қатысушыға диплом мен планшет, 3 орын — диплом және ұялы телефон.
Қалған қатысушыларға Алғыс хаттар мен ынталандыру сыйлықтары табысталды.
Жүлделерді Кентау қаласы әкімінің орынбасары Ақнұр Байболова табыстап, қатысушыларға шығармашылық табыс тілеп, жылы лебізін білдірді.
Балаларға қуаныш пен мотивация сыйлаған бұл шара олардың өнерге қызығушылығын арттырып қана қоймай, сыбайлас жемқорлыққа қарсы мәдениетті қалыптастыруға да зор үлес қосты.
Іс-шара Кентау қалалық ішкі саясат бөлімінің қолдауымен және «Түркістан облысының Азаматтық Альянсы» ЗТҚ нысанындағы бірлестігінің ұйымдастыруымен өткізілді.
