26 маусым – Халықаралық нашақорлыққа және есірткінің заңсыз айналымына қарсы күрес күні. Осы атаулы күнге орай, Сауран ауданында «Нашақорлық – қоғам дерті» тақырыбында ерекше шара өтті. Аудандық мәдениет үйі және аудандық емхана қызметкерлері таңғы жаттығу акциясына қатысып, салауатты өмір салтын ұстанудың маңыздылығын көрсетті.
Акцияның басты мақсаты – тұрғындар, әсіресе жастар арасында нашақорлықтың зияны туралы ақпарат беріп, дені сау қоғам қалыптастыруға үндеу. Таңғы жаттығу арқылы ұйымдастырушылар есірткіге қарсы күресте белсенді өмір салтының, дене белсенділігінің маңызды рөл атқаратынын жеткізді.
Шара барысында аудандық аурухананың дәрігерлері нашақорлықтың ағзаға, жүйке жүйесіне және қоғамға келтірер зияны туралы қысқаша түсіндірме жұмыстарын жүргізіп, қатысушыларға арнайы жадынамалар таратты. Сонымен қатар, «Есірткісіз болашақ», «Дені сау ұрпақ – жарқын келешек» секілді ұрандармен флешмоб өткізілді.
Мәдениет қызметкерлері мен медицина саласының мамандары бұл бастаманы жыл сайын дәстүрге айналдыру қажеттігін атап өтті. Себебі нашақорлықпен күрес – тек құқық қорғау органдарының ғана емес, бүкіл қоғамның ортақ міндеті.
Мұндай шаралар тұрғындарды сергек өмірге, спортпен айналысуға, зиянды әдеттерден алшақ болуға шақырып, ұлт денсаулығына бағытталған нақты қадам болып саналады.
