Президент Қасым-Жомарт Тоқаев инвестиция тарту мен кәсіпкерлікті дамыту мәселелеріне ерекше назар аударып, бірнеше нақты тапсырма берді.
Инвестиция тарту жөніндегі тапсырмалар
- 2029 жылға дейін 150 млрд доллар тікелей шетелдік инвестиция тарту
Мемлекет басшысы 2029 жылға қарай Қазақстан экономикасын екі есеге ұлғайтып, 450 млрд долларға жеткізу мақсатында шетелден 150 млрд доллар тікелей инвестиция тартуды тапсырды. Бұл үшін жаңа инвестициялық цикл іске қосылып, Инвестициялық кеңес құрылды.
- Инвестициялық штабтың құзыретін кеңейту
Инвестициялық жобаларды уақытылы және кедергісіз жүзеге асыру мақсатында Инвестициялық штабқа заңды күші бар уақытша нормативтік құқықтық актілерді әзірлеу құқығы берілді. Шешімдер қабылдауға құзырет беру арқылы инвестициялық климатты жақсарту көзделіп отыр.
- Бюрократияны жою және жедел шешім қабылдау
Президент инвестиция тарту ісінде бюрократияға жол берілмеуі тиіс екенін атап өтті. «Дәл осы жерде және дәл қазір» қағидасы бойынша шешім қабылдау қажет екенін айтты.
- Өңірлік инвестициялық жобаларды жандандыру
Мемлекет басшысы өңірлерде инвестициялық жобаларды көбейту және олардың тиімділігін арттыру бойынша нақты тапсырмалар берді. Әкімдер мен министрлердің инвестор тарту ісіне белсенді қатысуы талап етілді.
Кәсіпкерлікті дамыту жөніндегі тапсырмалар
- Кәсіпкерлерді қолдау және қорғау
Президент кәсібін адал жүргізетін кәсіпкерлерді бюрократия мен заңсыз әрекеттерден қорғау қажеттігін атап өтті. Олар жаңа, әділ экономиканы дамытудың локомотивіне айналуы тиіс.
- Қолайлы бизнес ортаны қалыптастыру
Кәсіпкерлердің еркіндігін шектеу емес, керісінше, елімізде бизнеске және инвестицияға жайлы орта қалыптастыру басты міндет ретінде белгіленді.
- Шағын және орта бизнесті қолдау
Мемлекет субсидия, жеңілдетілген несие және кепілдендірілген қарыз беру арқылы шағын және орта бизнеске қолдау көрсетіп отыр. Шағын және орта бизнестің ел экономикасындағы үлесі үздіксіз артып келеді.
Осы тапсырмаларды жүзеге асыру мақсатында Түркістан облысы, Сауран ауданы, Оранғай ауылдық округінің әкімі Берік Қуандық, «Жасыл Сауран» мекемесінің директоры Нұржан Бадамбаев және жеке кәсіпкерлер Түркия Республикасының Кония қаласына жұмыс сапарымен барды.
Іссапардың негізгі мақсаты – шетелдік инвестиция тарту, кәсіпкерлік байланыстар орнату және аудан көлемінде өндірістік әлеуетті арттыру. Сапар барысында делегация мүшелері Кония қаласындағы бірқатар индустриялық аймақтарды аралап, жергілікті өндіріс ошақтарының жұмысымен танысты. Сонымен қатар, ірі кәсіпорындармен іскерлік кездесулер өткізіліп, нақты әріптестік мүмкіндіктері талқыланды.
Атап айтқанда, гидравликалық қысым, механикалық діріл және PLC басқару жүйесіне негізделген автоматтандырылған машиналар шығаратын «Kanat Makina San. Tic. Ltd. Şti», мәрмәр тас өңдеу жабдықтарын өндіретін «Efeşen», сондай-ақ сүт өнімдері және бал өндіруге арналған машиналар мен жабдықтар шығаратын «Türköz» компанияларымен ынтымақтастықты нығайту мақсатында келіссөздер жүргізілді.
Кездесулер нәтижесінде екіжақты экономикалық байланысты дамытуға ниет білдірілді. Бұл сапар Сауран ауданы үшін жаңа өндірістік технологияларды меңгеру мен инвестициялық жобаларды жүзеге асыру бағытында маңызды қадам болмақ.
