Мемлекет басшысы Қасым-Жомарт Тоқаев бірлік пен бейбітшілікті сақтау мәселесіне ерекше назар аударып, бұл құндылықтарды елдің тұрақтылығы мен дамуының негізі ретінде атап өтті. Осы бағытта Мемлекет басшысы бірнеше нақты тапсырмалар берді:
Бірлік пен бейбітшілікті сақтау жөніндегі тапсырмалар
- Қазақстан халқы Ассамблеясының рөлін күшейту
Президент Ассамблеяның аймақтардағы жұмысын жандандыруды тапсырды. Мәселен, Түркістан қаласында жаңа Достық үйі ашылды, ал Алматы облысында осындай орталық салу қажеттілігі айтылды. Сондай-ақ, Қордай, Ұйғыр, Сайрам, Панфилов және басқа да аудандарда Ассамблея бөлімшелерін ашу тапсырылды. Бұл шаралар этносаралық келісімді нығайтуға бағытталған.
- «Ел бірлігі» орденін тағайындау
Ел арасында татулықтың айқын үлгісін көрсеткен азаматтарға «Ел бірлігі» атты жаңа мемлекеттік награда тағайындалатын болды. Бұл бастама қоғамдағы бірлік пен ынтымақты дәріптеуге бағытталған.
- Ақпараттық кеңістікте бірлік идеяларын насихаттау
Президент ақпараттық кеңістікте бірлік пен келісім идеяларын кеңінен дәріптеудің маңыздылығына назар аударды. Бұл міндет Ассамблеяның барлық құрылымына, әсіресе, журналистер клубына жүктелді.
- Мәдениет пен өнер арқылы бірлікті нығайту
«Бірлігіміз – әралуандықта» қағидатын жүзеге асыру үшін мәдениет пен өнердің әлеуетін толық пайдалану тапсырылды. Мысалы, Александр Пушкин, Тарас Шевченко, Федор Достоевский, Михаил Шолохов және басқа да тұлғалардың музейлерінің экспозицияларын Астана мен Алматыда және басқа да қалаларда ұйымдастыру маңызды деп атап өтілді.
Осы тапсырмалар мен бастамалар негізінде Сауран ауданы әкімдігі ішкі саясат бөлімінің»Жастар ресурстық орталығы» КММ-нің ұйымдастыруымен «Бірлік пен бейбітшілік — ұлтаралық татулықтың кепілі» тақырыбында аудан жастарына түсіндірме жұмыстары жүргізілді.
Ұлтаралық татулық – кез келген елдің тұрақты дамуы мен қоғамдық келісімінің іргетасы. Әсіресе, Қазақстан сияқты көпұлтты мемлекет үшін бұл – өмірлік маңызы бар ұғым. Біздің елде 130-дан астам ұлт пен ұлыс өкілдері тату-тәтті өмір сүріп келеді. Олардың әрқайсысы тілін, ділін, салт-дәстүрін сақтап, бір шаңырақ астында бейбітшілік пен ынтымақта өмір сүруде.
Қазақстан халқы Ассамблеясы – осы ұлтаралық келісімді нығайтуға бағытталған бірегей институт. Ол этностар арасында өзара құрмет пен түсіністікті дамытып, ұлттар арасындағы татулықты насихаттауға атсалысады.
Ұлтаралық татулық – тек заңдармен емес, жүректен басталатын түсіністік пен құрметпен орнығады. Егер әрбір адам өзге ұлтқа түсіністікпен қарап, ортақ болашақ үшін еңбек етсе – елімізде бейбіт өмірдің діңгегі бекем болары сөзсіз.
