Созақ ауданында қайырымдылық бағытындағы игі істер жүйелі түрде жүзеге асырылуда. Бұл орайда, аудандық “Отбасын қолдау орталығы” коммуналдық мемлекеттік мекемесінің ұсынысы негізінде көпбалалы отбасыларға қолдау көрсетілді.
Жомарт жүректі кәсіпкерлер – “GOLD PARK” балалар ойын алаңының иесі Дастанова Айдана Жайықбайқызы және жеке кәсіпкер Әбілқасым Ақмарал Өскенқызы өздерінің демеушілік көмектерін көрсетті. Аталған кәсіпкерлер көпбалалы отбасы балаларына тәтті торттар, сусындар, балмұздақтар ұсынып, олардың анасы мен балаларына киім-кешек сыйлады.
Осы игі іс-шара үшін бұл кәсіпкерлерге “Отбасын қолдау орталығы” мекемесінің директоры Ә.Елібаевтың атынан алғыс хат пен естелік сыйлық табысталды.
Көрсетілген қолдау үшін отбасы мүшелері шынайы алғыстарын білдіріп, кәсіпкерлер мен орталық қызметкерлерінің жұмыстарына табыс пен береке тіледі.
Бұл бастама – қоғамдағы әлеуметтік жауапкершіліктің артуының нақты көрінісі ретінде бағаланып, алдағы уақытта да жалғасын табатын болады.
