Түркістан облысында жастардың қатысуымен экологиялық сенбілік және қауіпсіздікке бағытталған оқыту шарасы өткізілді.
Түркістан облысы қоғамдық даму басқармасы «Жастар ресурстық орталығы» коммуналдық мемлекеттік мекемесінің ұйымдастыруымен «Таза Қазақстан» экологиялық акциясы аясында «Қоқыссыз өзен: экология, спорт және қауіпсіздік» тақырыбында экологиялық сенбілік және ақпараттық-түсіндіру шарасы өткізілді.
Аталған іс-шараның негізгі мақсаты — жастар арасында экологиялық мәдениетті қалыптастыру, қоршаған ортаға жауапкершілікпен қарау қажеттілігін дәріптеу, сондай-ақ суға шомылуға тыйым салынған аумақтарда орын алуы мүмкін төтенше жағдайлардың алдын алу бойынша түсіндіру жұмыстарын жүргізу.
Іс-шараға Кентау қаласы және Сауран ауданынан келген 150-ге жуық ерікті жас қатысты. Қатысушылар Ораңғай өзені жағалауын қоқыстан тазартып, экологиялық ахуалды жақсартуға үлес қосты.
Іс-шара барысында Түркістан облысы Төтенше жағдайлар департаментінің қызметкерлері жастарға арналған оқыту сабақтарын өткізіп, суға түсу кезіндегі қауіпсіздік ережелері, алғашқы медициналық көмек көрсету әдістері, судағы төтенше жағдайлардың алдын алу шаралары жөнінде практикалық және теориялық ақпараттар берді.
