Сауран ауданында қазақ поэзиясының көрнекті өкілі, Қазақстанның халық жазушысы Тұманбай Молдағалиевтің туғанына 90 жыл толуына орай «Тұманбай жыры – тұнған жыр» атты әдеби-сазды кеш ұйымдастырылды. Шараны ауылдық кітапхана ұжымы өткізді.
Кешке ауыл тұрғындары мен оқырмандар қатысып, ақын шығармашылығынан рухани әсер алды. Кітапханашы Сағындықова Гүлзат Тұманбай Молдағалиевтің өмірі мен әдеби мұрасы туралы мазмұнды баяндама жасап, қатысушылар назарына ақынның кітаптарынан құралған инсталляциялық көрмені ұсынды.
Кеш барысында ақын сөзіне жазылған әндер шырқалып, көрермендерге ерекше көңіл күй сыйлады. Қожанова Құрбанай «Бақыт құшағында», Шырынбекова Гүлжауһар «Куә бол» әндерін әсерлі жеткізсе, Сұлтанова Бағила «Сағындым ғой» әнімен көрермен жүрегіне жол тартты.
Сондай-ақ, 8-сынып оқушылары Нұриддин Інжу мен Нұрланқызы Нұргүлім ақын өлеңдерін жатқа оқып, жас ұрпақтың поэзияға деген сүйіспеншілігін көрсетті.
Кеш соңында сұрақ-жауап ұйымдастырылып, шара «Құстар қайтып барады» әнімен қорытындыланды.
Іс-шараның басты мақсаты – ақын шығармашылығын насихаттау, жастарды рухани құндылықтармен тәрбиелеу және ұлттық әдебиетке деген құрметті арттыру болды.
