Әлеуметтік масылдық – еңбекке қабілетті азаматтардың өз мүмкіндіктерін пайдаланбай, мемлекеттің көмегіне ғана сүйенуі, қоғамда жеке жауапкершілік пен белсенділіктің төмендеуі. Бұл құбылыс экономикалық, әлеуметтік дамуға кері әсерін тигізеді әрі азаматтардың ынтасын жояды.
Мемлекет басшысы Қасым-Жомарт Тоқаев өз Жолдауларында және әлеуметтік саясатты жетілдіру жөніндегі кеңестерде бұл мәселеге ерекше назар аударып келеді. Президенттің пікірінше, масылдық психологияны жою – тиімді әрі әділетті әлеуметтік саясаттың негізгі бағыттарының бірі.
«Әлеуметтік қолдау жүйесі шын мәнінде мұқтаж жандарға бағытталуы керек. Ал еңбекке қабілетті азаматтар жұмыс істеуге ұмтылуы тиіс. Мемлекет барлығын асырай алмайды. Бізге масылдық емес, еңбекке деген ынта мен ұмтылыс қажет», – деді Мемлекет басшысы.
Президенттің берген нақты тапсырмалары:
— Әлеуметтік көмекті шынайы мұқтаж адамдарға ғана көрсету тетіктерін күшейту;
— АӘК (атаулы әлеуметтік көмек) жүйесін әділетті және тиімді етіп реформалау;
— Жұмысқа қабілетті азаматтарды еңбекке тарту бойынша жұмысты күшейту;
— Әлеуметтік қызметтерді цифрландыру арқылы масылдықтың алдын алу;
— Қоғамда еңбекқорлық, жауапкершілік пен кәсіпкерлік мәдениетін насихаттау.
Заңнамалық және жүйелік шаралар:
— «Әлеуметтік кодекс» шеңберінде масылдықтың алдын алуға бағытталған нормалар енгізілді;
— Қоғамдық бақылау мен әлеуметтік аудит тетіктері кеңейтілуде;
— Әлеуметтік келісімшарт жүйесі арқылы еңбекке бейімдеу жұмыстары жүргізілуде.
Әлеуметтік масылдық – ұлттың бәсекеге қабілеттілігіне қауіп төндіретін фактор. Президенттің тапсырмасына сәйкес, Қазақстанда азаматтарды еңбекке ынталандыру, жеке жауапкершілікті арттыру және әлеуметтік әділеттілікті қамтамасыз ету бағытында нақты реформалар қолға алынуда.
