Қазақстан Республикасының Президенті Қасым-Жомарт Тоқаев өзінің Жолдауларында және мемлекеттік саясаттың басым бағыттары жөніндегі сөздерінде әлеуметтік масылдыққа жол бермеу қажеттігін бірнеше рет қатаң түрде атап өтті. Мемлекет басшысы атап өткендей, қоғамда еңбекке деген құрмет пен жеке жауапкершілік қағидатын орнықтыру – еліміздің орнықты дамуының негізгі алғышарттарының бірі болып табылады.
Масылдық сана – еңбекке қабілетті азаматтардың өз мүмкіндіктерін пайдаланбай, үнемі мемлекеттің немесе айналасындағылардың көмегіне иек артып өмір сүру үрдісі. Бұл ұстаным азаматтың өзін-өзі дамытуына, отбасын қамтамасыз етуіне және қоғамның дамуына белсенді қатысуына кедергі келтіреді.
Масылдық сананы жеңудің басты жолы – еңбек ету:
- Еңбек – басты құндылық ретінде Мемлекет еңбекке қабілетті азаматтардың барлығын нәтижелі жұмыспен қамтуға шақырады. Жеке табыс табу, кәсіп ашу, мамандық игеру – бұл қоғамда өзін-өзі құрметтеудің және дамудың негізі.
- Еңбекке ынталандыру тетіктері
— «Жастар практикасы», «Бастау Бизнес», «Жаңа кәсіп» сияқты бағдарламалар арқылы кәсіби қайта даярлау және жұмысқа орналастыруға мүмкіндік беру;
— Әлеуметтік көмекті еңбекпен ұштастыра отырып, шартты түрде тағайындау тетігін енгізу.
- Кәсіпкерлікке жол ашу
Еңбек арқылы жеке кәсіп бастаған азаматтарға мемлекет тарапынан төмен пайызды несие, грант, оқыту курстары ұсынылуда. Бұл – масылдықты емес, дербестікті нығайтудың нақты жолы.
- Қоғамдық сананы өзгерту
Еңбек адамының абыройын арттыру, адал табыс пен кәсіп иелерінің үлгісін насихаттау арқылы қоғамда еңбекке құрмет көрсету мәдениетін қалыптастыру қажет.
- Әлеуметтік әділеттілікті қамтамасыз ету
Көмек тек мұқтаж азаматтарға бағытталып, еңбекке ынтасы бар азаматтар жұмыспен қамтуға бейімделуі тиіс.
Әлеуметтік масылдықпен күресте ең тиімді әрі ұзақмерзімді құрал – еңбекке деген ынта мен дағдыны дамыту. Еңбек – тек күнкөріс көзі емес, ол – адамның өзін-өзі жүзеге асыруының, қоғамдағы орнын табуының және ел дамуына қосқан үлесінің көрінісі. Осыған орай, мемлекет азаматтарды еңбекке бейімдеуге бағытталған саясатын жүйелі түрде жалғастырып, масылдық санаға қарсы тұруды стратегиялық міндет ретінде айқындап отыр.
