“World Cleanup Day” халықаралық экологиялық акциясы аясында Сауран ауданының Оранғай ауылдық округінде, Қарашық өзені бойында тазалық шарасы ұйымдастырылды.
Аталған іс-шараға аудан әкімі қатысып, сөз сөйлеп, табиғатты қорғау мен қоршаған ортаны таза ұстаудың маңыздылығына тоқталды. Сонымен қатар, тұрғындарды тазалық жұмыстарына белсенді қатысуға шақырды.
Тазалық акциясына ауылдық округ тұрғындары, аудандық дербес бөлімдердің қызметкерлері мен мекеме ұжымдары тартылды. Шараға барлығы 1500-ге жуық адам қатысып, 26 арнайы техника жұмылдырылды. Нәтижесінде 87 тонна қоқыс шығарылды.
Бұл акция аудан аумағында экологиялық мәдениетті арттыруға, табиғатқа жанашырлық танытуға және тұрғындардың қоршаған ортаға деген жауапкершілігін күшейтуге бағытталды.
Сауран ауданы әкімдігінің баспасөз қызметі
