Оранғай ауылдық округінде «Таза Қазақстан» экологиялық акциясы аясында ауқымды тазалық шарасы ұйымдастырылды. Шараның негізгі мақсаты қоршаған ортаның санитарлық жағдайын жақсарту, экологиялық мәдениетті қалыптастыру және тұрғындарды ортақ тазалыққа жұмылдыру болып табылады.
Тазалық жұмыстарына ауыл тұрғындары, мекеме қызметкерлері және еріктілер қатысып, жалпы саны 800-ге жуық адам белсенділік танытты. Сонымен қатар, санитарлық-тазалық жұмыстарын жүргізу үшін 7 арнайы техника жұмылдырылды.
Шара барысында елді мекен аумағындағы көшелер, қоғамдық орындар, арық-атыздар мен ашық аумақтар қоқыстан тазартылды. Нәтижесінде жалпы көлемі 18 тоннаға жуық тұрмыстық қалдықтар мен қоқыстар шығарылып, арнайы орындарға жеткізілді.
Аталған іс-шара аудан көлемінде экологиялық ахуалды жақсартуға, тұрғындардың табиғатқа деген жауапкершілігін арттыруға және елді мекендердің санитарлық жағдайын жүйелі түрде жақсартуға бағытталды.
Сауран ауданы әкімдігінің баспасөз қызметі
