Түркістанда қоларбада отырып билеуден әлем чемпионы Ермек Қалымбетовтың «Бәрі мүмкін» атты бенефис шоуы өтті.
Салтанатты кешті Ермек Қалымбетовтың ата-анасы ашып берді. Сондай-ақ облыстық «Фараб» әмбебап ғылыми кітапханасының директоры Жанат Шардарбекова құттықтау сөз сөйледі.
Жиында халықтың ерекше сүйіспеншілігіне бөленген азаматтың жеке өмірінен бастап, қоғамдағы орны мен шығармашылығы туралы көрсетілді. Кеш иесінің орындауындағы әсем әндер мен билеген билері көпшілік көңілінен шықты.
Сонымен қатар әріптес-достары да сахнада бірге өнер көрсетіп, халықтың қошеметіне бөленді. Ал әлем чемпионатына бірге қатысып жүрген әріптесі Айдана Мұқановамен биі өнердің шексіз екенін дәлелдеді.
Айта кетейік, Ермек Қалымбетов Түркістан облысы Сайрам ауданында 1991 жылы 10 қарашада дүниеге келген. Өткен жылы 12 қыркүйек күні Словакияда өткен қоларбада билеу жарысынан өткен Әлем кубогында І және ІІ орынды иеленіп, Қазақстанның Көк туын желбіреткен болатын.
