Сауран ауданы әкімдігінің ішкі саясат бөлімінің «Жастар ресурстық орталығы» КММ-нің ұйымдастыруымен Шорнақ ауылдық округіндегі Балалар саябағында жастарға арналған «Zhastar Party» атты мәдени-танымдық іс-шара өтті.
Шараның ашылу салтанатында Сауран ауданы әкімдігі ішкі саясат бөлімінің басшысы Тәжібеков Нұрғазы Байғазыұлы сөз сөйлеп, кешке қатысқан пробация есебіндегі жастарға, NEET санатындағы азаматтарға және ауданның белсенді жастарына шығармашылық табыс пен көтеріңкі көңіл-күй тіледі.
Іс-шараның мақсаты – жастардың бос уақытын тиімді өткізуге жағдай жасау, шығармашылық қабілеттерін дамытуға қолдау көрсету, құқықбұзушылықтың алдын алу және өнер арқылы әлеуметтік бейімделуіне мүмкіндік беру.
Кеш барысында жастар ән айтып, түрлі өнер түрлерін ортаға салып, бір-бірімен етене араласты. Шара достық пен өзара қолдауға негізделген ашық ортада өтті.
Аталған іс-шара жастардың мәдени дамуына, тұлғалық қалыптасуына және қоғамдық өмірге белсенді араласуына ықпал етеді деп күтілуде.
Кеш барысында жиналған көрермендер іс-шараға белсенді қатысқан жастарға және ұйымдастырушыларға алғыс білдірді.
